Sa supa gadduresa o supa cuata est unu pratu tìpicu de Gaddura, subregione istòrica e geogràfica de sa Sardigna de su nord ma est isparghinada fintzas in àteras leadas de s’ìsula.
S’ammàniat ponende in una tèllia paritzos pìgios de pane tostadu chi s’ammòddigat cun su brodu de petza de berbeghe – e s’incapas insaboridu cun petza vùvula – e irrichidu cuyn su casu de baca fratadu, a cantos o sinono a fitas e postu intre de sos pìgios de pane. Cherende si podet pònnere casu betzu de berbeghe. Si podent fintzas annànghere nuscos de menta, pedrusèmene, cannella, nughe muscada e àteras erbas aromàticas. Si coghet posca in su forru.
Si podet tastare custu pratu in paritzas interpretatziones locales incluidas sas variantes in ue in logu de su pane tostadu si ponet sa ispianada o su pane carasau.
Nointamas chi in tempos colados lu mutiant unu pratu de pòberos ca fiat simple meda, est intamas su pratu prus de importu de sas mesas gadduresas, siat pro sas classes ricas chi cussas pòberas e est cunsideradu dae semper unu primu in ocasiones de importu che a sas festas o “a li coi”, sos gustos de coja de sa Gaddura.
Comente s’ammàniat.
A primu cosa tocat de ammaniare su brodu de petza de berbeghe. Posca tocat de fratare su casu in unu istèrgiu e l’insaborire cun pìbere macinadu bundante. Segare su pane tostadu a fitas e pònnere in su fundu de una tèllia. Isparghinare unu pìgiu bundante de casu fratadu chi s’ata cobèrrere torra cun àteru pane fintzas a unu ùrtimu pìgiu ue s’at a pònnere àteru casu fintzas a lòmpere a 4 pìgios.
Posca si ghetat su brodu de berbeghe subra de su pane e de su casu faghende intzupare bene. Acabbadu custu tocat a cobèrrere galu cun casu e inforrare a 200° pro 30 minutos belle fintzas a cando su brodu no at a èssere evaporadu de su totu e in su pìgiu de subra si siat formada una crostighedda rujastra de casu.
AIG
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
