Cada poesia est de carchi manera una espressada de una terra, de unu pòpulu, est sa foto de una manera de vìvere.

Benit male duncas a cummentare s’espressada artìstica de chie, in rima, tenet su donu de impitare pagas allegas pro descrìere paritzas emotziones e ammentos. Cada sardu intendet in sa carena sua e in su coro sas emotziones chi Montanaru (Antiogru Casula) at provadu a pònnere in su paperi sa figura de sa tzia de filare. Totus ant connotu una tzia de filare, una figura chi faghet parte de s’ànima prus pura e dolorosa de sa gente sarda. No est sa descritzione de sa Sardigna de intro, de sa soledade e de su dolore, o mègius no est petzi custu.

Cada sardu at bidu sa lughe de sos ogros de una tzia de filare: su coràgiu, sa pelea, su dolore, sa fotza de tirare a in antis sena perunu tzùnchiu, sena pedire agiudu; e a cada sardu l’intrat su fritu intendende sas allegas “e giughiat in sos ojos terrìbile prantu e unu lutu de sèculos in fronte”; su prantu de chie at retzidu petzi dolores dae sa vida e mancari gasi comente un’àrbore assoladu in sos montes parat fronte cun coràgiu e rassinnadura a sas molinadas de bentu de una vida tosta e de corrutu de una cunditzione pluriseculare de istrecadura e amargura.

Ma mancari gasi custa amargura, custu dolore sunt parte de sa sotziedade sarda chi essit a campu in sos cantos tristos chi sunt espressada de corrutos intesos mancari si non in costas pròprias, eredades de unu coladu malu e crispu in una terra chi no istrinat nudda.

Ma custa fèmina, chie est? Pedit su poeta acabende su testu. Nemos l’ischit e totus la connoschent. Crèschida pro traballare, ma nàschida pro patire, vìvida nointamas sa vida, morta in su mudìmine de sa soledade.

M.B.

Attività realizzata col contributo della Regione Sardegna – IMPRENTAS 2020-2021. LR 22/2018, art22