Mentovamus s’aligusta “a sa catalana”, unu màndigu deleitosu, buddida e serbida a mesa cun sale, pìbere e ògiu ermanu. Bisòngiat de segare a cantigheddos una parte de sa purpa de s’aligusta, a la capulare e a l’ammisturare paris cun sa sartzighedda in colore de castàngia chi si faghet cun sa conca. Cun s’atzunta de un’ispitzuleddu de sale, de pìbere e de sutzu de limone, in fines, nd’at a essire una sartzighedda chi cheret ghetada a subra de s’aligusta etotu. Si diat pòdere acumpangiare bufende una tassa de “Terre bianche”, de orìgine ispagnola e cun 12 grados de alcol.
Intra de sas àteras licanias de mare, cussigiamus sa capitana cun sartza de àgiu e aghedu, a pustis de l’àere buddida; ma sa capitana s’acumpàngiat fintzas cun una sartzighedda fata cun tomata, pedrusèmene e àgiu, chi est s’ingrediente prus de importu. Un’àtera licania non de mare, ma chi est mala a ismentigare, est sa “Supa de faa”, una supa fata cun faa, càule, sartitzu, sùmene capuladu, peigheddos de porcu, àpiu, pastinaga, chibudda, àgiu, pilarda e fenugreddu de sartu. Est saborida meda prus che totu in su tempus de sa cumpridura de sa faa, in freàrgiu-martzu, e a sos aligheresos etotu lis agradat – gasi etotu comente a sos turistas – acumpangiada dae su binu “Rubicante”, una calidade de binu cun 16-17 grados alcòlicos.
Intra de sos segundos non tocat de si nde ismentigare de sa supa de pische, fata cun pische friscu de genias diferentes. Agradat meda gràtzias fintzas a unos cantos cundimentos comente a su piberoneddu ruju. Intra de sos màndigos de terra bisòngiat de ammentare su pedringianu a s’aligheresa, inforradu cun àgiu, pedrusèmene e ògiu ermanu e papadu paris cun sas pumatas camona, sa tomata frisca de su sartu de S’Alighera. Un’àtera licantzadoria sunt fintzas sos peuxtus, est a nàrrere sos peigheddos de angione cundidos cun una sartza pitziosa fata cun tomata, aghedu, àgiu e piberoneddu.
AIG
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
