In Chida Santa, in antis de Pasca Manna, sos usos antigos ammentant momentos de importu de sa vida de Gesùs Cristos, dae sa cundenna a sa resurretzione. Custos avesos in Sardigna ant connotu mudaduras gràtzias a costumàntzias ebràicas e cristianas, ma de seguru est cun sa dominatzione ispanniola chi custas tzelebratziones si sunt fatas prus ricas e pretziadas, fintzas prus teatrales e misteriosas.
Bastet a pensare a sas faches cuadas cun mucadores e cuguddos e a su caminare lentu de is pranghidoras chi acumpàngiat sa rughe, connotu comente a S’Iscravamentu, e a sa prufessone chi passat peri sas bias de sa bidda in sa bellesa de s’iscuriu de su merie. Intra de is prus bellas regordamus sa de Otzana, sa de Casteddu Sardu, sa de Casteddu, sa de Igrèsias e sa de Bortigale. Onniuna de custas allogat avesos antigos meda e oe sunt un’ocasione siat pro mustrare sa passione de sa gente siat su ischire, s’identidade e is traditziones de su connotu de Sardigna.
Bestimentas e ordimìngios antigos, càntigos, rughes de linna, pannos: sunt sos trastes allogados bene in sas crèsias, a tenore de comente sa gente de sas biddas allogaiat custas formas de devotzione sena de tempus, prenas de bellesa e arrichidas cun su tempus dae sa gente chi arribaiat dae foras.
S’iscummissa de oe est sa de chircare de fàghere a manera chi totu custu non siat una forma de ispetàculu ebbia, fatu pro sos turistas e pro chie cheret connòschere custos avesos, ma tocat a nde sarvare s’ispìritu antigu, respetende sas pregadorias e s’impinnu chi bi poniant sos antigos. In custos ùrtimos annos custos avesos antigos los ant fatos a connòschere mègius in totu su mundu, gràtzias a sos sotzial e a àteras ainas noas de comunicatzione.
AIG
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.