Su pane sardu narat cosas meda de s’ìsula nostra. Sas variedades de pane, sas formas e sa calidade inditant su logu in ue si faghet, pro cale ocasione si faghet e fintzas, carchi borta, su tzetu sotziale o sas possibilidades econòmicas de chie lu faghet. Sas variedades sunt medas e inditant fintzas sas orìgines antigas e sas influèntzias chi benint dae sas tzivilidades chi bi sunt istadas in su tempus. A custu agiunghimus su fatu chi in sos logos de su Mediterràneu s’agatant cosas assimigiantes meda pròpiu in sa manera de fàghere su pane. Tando, pro resùmere: su pane contat e no ismèntigat nudda. Su pane si faghiat segundu su bisòngiu de sa famìllia e sas possibilidades econòmicas suas. In ocasione de sas festas mannas (Nadale e Annu Nou, Pasca Manna e àteras ricurrèntzias), a prus de su pane de ogni die, si faghiant puru panes particulares pro sa festa e fintzas durches. Su traballu impinnaiat a sa mere de domo, a sas fìgias e a totu sas fèminas de sa famìllia, su prus de sas bortas cun s’agiudu de fèminas de su bighinadu chi si pagaiant cun su pane etotu. Su traballu comintzaiat a mangianu chitzo e sighiat in momentos bene istabilidos finas a arribare a sa coghidura in su forru. Sas dies dedicadas pro fàghere su pane faghiant parte de s’avesu de totu sas famìllias. Calicunu de sos panes prus connotos sunt de seguru su pane fresa o su pane carasadu, su civraxu, sos cocois pintados, sos cogones o ispianadas, sos cogones cun gherdas, sos cogones de patata, sas cocas e àteros meda. Si faghet gasi dae tempus antigu: farinas de trigu traballadas a manu cun abba e sale, ufròngiu lentu cun sa madrighe collida dae sas bortas passadas, coghidura in su forru a linna. Sinnos e ingredientes totunos ma un’infinidade de formas, sabores e impreos. Frammentu o madrighe sunt sos nùmenes prus comunes in Sardigna pro su “lièvito madre”, cosa chi non podet mancare mai de sa traditzione antiga. a-i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22