Italia Eventi 24
LinguaIT
Su pesamentu de su bestiàmene in Sardigna

Cando si faeddat de pesamenta de su bestiàmene in Sardigna, in su matessi tempus si faghet riferimentu a sa cultura manna de su pastoriu de s’ìsula. In contu de custu s’intendet semper prus faeddende de cuntzetos comente a ‘pastoralismu’, chi inditant s’istèrgiu mannu in ue collocare su bagàlliu de connoschèntzias, su connotu e sos avesos chi faghent a manera chi s’arte de pesare su bestiàmene in Sardigna siat ùnica.

Sa Sardigna abarrat fidele, in sa parte manna de sos allevamentos suos de berbeghes, a una genia de pesamenta ‘a pegus lìberu’, impreende s’istalla pro nche regòllere su bestiàmene a su note ebbia e pro partzire sas berbeghes in: leva noa e laghìngia; cun custa paràula s’inditant sas berbeghes prus giòvanas e chi devent angiare pro sa prima borta.

Custos allevamentos preferint, duncas, sa pastura e, bortas meda, pro sa matessi resone, tocat de cambiare su bestiàmene a cara a pasturas noas. Custa pràtica teniat fintzas resones econòmicas suas, in prus de su bisòngiu craru de agatare pasturas mègius a tenore de sa simana de s’annu. Sa pastoria e su tramudu de su bestiàmene dae unu logu a s’àteru, sunt istados pro sèculos s’istrutura econòmica de sa Sardigna prus antiga e ant mantesu unas cantas particularidades totunas dae sa Preistòria a s’Edade cuntemporànea. A connòschere custas cosas cheret nàrrere, duncas, a si fàghere un’idea bastante bera de una parte manna de s’identidade culturale e econòmica de sa Sardigna.

Su produsimentu prus mannu de sa berbeghe sarda est su de su late. In su tempus de mùrghere, chi durat pagu prus o mancu ses meses, una berbeghe produet in mèdia dae 80 a 100 litros de late; non mancant però berbeghes cun produsimentos mesanos 140/150 litros cadauna. Su produsimentu de sa petza, pro su prus, est su de sos angiones de late, chi si masellant a pesu biu de unos 8/10 chilos. Su produsimentu de sa lana, imbetzes, oe in die est de pagu importu econòmicu.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22

 

Redazione SardegnaEventi24.it

Redazione SardegnaEventi24.it

2312 eventi pubblicati

786 notizie pubblicate

0 aziende pubblicate

# Altre Notizie

  • Facebook
  • Instagram
  • Twitter
  • Google+
  • Youtube
  • Feed

TERRA DE PUNT SRL P.IVA 03794090922

Numero REA: 298042 - Iscrizione ROC: n. 32207

SARDEGNAEVENTI24 è una testata giornalistica registrata presso il tribunale di Sassari n. 1/2018

Sede Legale: Via Anglona 7, 09121 Cagliari

Sede Operativa: Viale Trento 15, 09123 Cagliari

X
en Englishfr Françaisde Deutschit Italianopt Portuguêses Español