Is sardus seus 50 annus arrexonendi de lìngua sarda ma oindii sa chistioni no parit ancora strobeddada cumenti si spetat. Sa cosa est mòvia de bàsciu, de su pòpulu e de unus cantu intelletualis e militantis de su sardu chi a s’acabu de su ‘78 nci dd’iant fata a fai lompi a su Consillu una proposta de lei po su bilinguismu. De intzandus is arrexonadas e is ocasionis funt stètias paricis, in su ‘81 sa Tutela della minoranza linguistica sarda, in su ‘89 su Testo Unico sulla lingua sarda, in su ‘93 sa Disciplina della lingua e della cultura della Sardegna, in su ‘97 sa lei 26 e in su 2018 sa lei 22 po sa Disciplina della politica linguistica regionale.

Is àutus de custas arrexonadas funt on line e ddus podit ligi e castiai chini si siat, chi est interessau. Sa chistioni at sighiu in foras puru, mancu a ddu nai, in mesu de sa genti e de is assòtzius, e est sighendi finas oi, cun passionis e militàntzias, ma fintzas brigas e scontròrius, passus a innantis e passus agoa, caminendi frima frima tra milli strobus. E duncas est pretzisu a cumprendi cumenti at caminau sa cosa aintru de is istitutzionis sardas, movendi de is fontis ofitzialis cumenti nisciunus iat fatu innantis de manera aici pretzisa. Ndi bessint a campu chistionis polìticas, sotzialis e curturalis mannas, chi càmbiant cun su tempus puru.

Torrendi a ligi is fueddus de is consilleris sardus si cumprendint is dinàmicas istitutzionalis, chini nc’at crètiu e chini at bogau pinnicas po fai arresci sa cosa. Mancai eis a scoberri calincuna cosa curiosa o chi no s’abetastis de polìticus chi estis avotau, po cussu est sèmpiri importanti a castiai is documentus originalis e no a chistionai de cosa intèndia innoi e innias. Calincunu passiteddu a innantis gei dd’eus fatu puru, ma sa batalla de su sardu seus ancora a dda binci.

T.C.

Attività realizzata col contributo della Regione Sardegna – IMPRENTAS 2020-2021. LR 22/2018, art22