A pustis de s’esperièntzia bella de su 2020, ocannu puru Suns Europe – cuncordadu dae sa cooperativa “Informazione Friulana”, editora de Radio Onde Furlane cun s’agiudu finantziàriu de sa Regione Autònoma de su Friuli-Venètzia Giùlia, de s’ARLeF – Agjenzie Regjonâl pe Lenghe Furlane e de sa “Fondazione Friuli”, a manos de pare cun su Comune de Ùdine, de s’Istitutu bascu Etxepare e de àteros sugetos meda, pùblicos e privados, locales e internatzionales – s’at a presentare in una beste de istadiale annoada, intra de trìulas e austu de su 2021, interessende unos cantos logos de su Friuli.
Intra de sas novas cheret sinnalada s’essida de su bandu nou. In s’editzione passada, difatis, sos organizadores, cunsideradu su momentu particulare pro more de sa pandemia, aiant lassadu istare sa cumpetitzione, seberende de invitare unos cantos grupos “acanta” de Suns Europe. Torrat a comintzare sa chirca de formatziones noas, grupos e autores, chi produent mùsica espressione de comunidades linguìsticas minorizadas de Europa.
Sas candidaduras cherent presentadas a intro de su 6 de làmpadas 2021, compilende su mòdulu in lìnia (disponìbile in s’indiritzu https://www.sunseurope.com/it/call-2021). S’ant a ammìtere cumpositziones originales e noas ebbia, seberadas a giudìtziu chi non si podet transire dae su comitadu artìsticu de Suns Europe. A sos finalistas seberados los ant a invitare a Friuli pro sonare in presèntzia in s’ispetàculu prus de importu de su fèstival o – e custa est un’àtera nova – in unu de sos cuntzertos prevìdidos in àteros logos de su Friuli. Comente prevident sas règulas sanitàrias in vigèntzia oe in die, a sos òspites seberados si diat pòdere domandare de fàghere unu tampone PCR SARS-CoV2 in sas 48 oras in antis de sa partèntzia. Pro cale si siat bisòngiu, pro domandare crarimentos o informos faghet a iscrìere a: info@sunseurope.com .
Àteros informos si podent agatare in s’indiritzu www.sunseurope.com e in sa pàgina Facebook ‘SUNS Europe’ e in su perfilu Instagram “sunsfestival”.
a.i.g.
Attività realizzata col contributo della Regione Sardegna – IMPRENTAS 2020-2021. LR 22/2018, art22

Redazione SardegnaEventi24.it
2312 eventi pubblicati
786 notizie pubblicate
0 aziende pubblicate