In ocasione de sos 150 annos dae sa nàschida de Gràtzia Deledda (1871-2021), s’Amministratzione comunale de Tàtari at aprontadu un’eventu pro ammentare a s’ùnica iscritora italiana chi at tentu s’onore de bìnchere de su Prèmiu Nobel pro sa literadura. S’initziativa “Omaggio a Grazia Deledda” s’at a fàghere in su CineTeatro Astra martis 14 de nadale a sas 11 e naschet a pustis de sa motzione presentada dae sa cussigera comunale Virginia Orunesu, votada a majoria dae su Cussìgiu comunale e cumpartzida dae s’Assessoradu de sa Cultura. Pro partetzipare a s’eventu non si pagat nudda. Pro informatziones e prenotatziones si podet imbiare un’e-mail a s’indiritzu cultura@comune.sassari.it in intro de lunis 13 de nadale a sa una.

Sunt prevìdidos sos interventos de sas iscritoras Rossana Dedola e Isabella Mastino, de sos dischentes e de sas dischentes de su litzeu musicale corèuticu D. A. Azuni e de s’Istitutu cumprensivu de San Donato. S’at a dare un’atentu particulare a s’arte teatrale e a sa poesia gràtzias a sos interventos de s’atore Domenico Campesi e de su poete Mario Cherchi. Su giornalista  Giampiero Farena at a fàghere a moderadore.

S’eventu rapresentat un’ocasione de importu pro ammentare e festare s’iscritora manna nugoresa, chi abarrat oe in die un’esempru de firmesa, cussèntzia e indipendèntzia fintzas pro sas generatziones chi ant a bènnere.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22