Ocannu puru, mancari cun sos istorbos e sas dificultades ingendradas dae s’emergèntzia de sa Covid-19, su Comune de Dèsulu est prontu pro acasagiare sa de tres editziones de su fèstival teatrale “Teatros de monte” dae su 19 a su 22 de austu. Sa faina la patrotzinant su Comune de Dèsulu, sa Comunidade montana de Gennargentu-Mandrolisai, sa Regione Sardigna e su Cunsòrtziu BIMF. La cuncordat sa cumpangia teatrale casteddaja Artisti Fuori Posto e at portare in sa bidda de monte ispetàculos e laboratòrios meda chi s’ant a pòdere sighire gratis. Su 19 de austu su fèstival at a cumentzare cun su magu MyCras cun s’ispetàculu “Calicuna cosa istramba” chi at a èssere in iscena in sa pratza ammajadora de Santu Antoni. Su 20 at a tocare a sa cumpangia Figli d’arte Medas, a sas 21.30, in sa pratza aberta de s’Istitutu cumprensivu, cun s’ispetàculu “Canale 16” cun Gianluca Medas, Piero Murenu, Alessandro Pani e Filippo Salaris, un’òpera in contu de su degòlliu de sa nave Moby Prince acontèssidu in su 1991. Su 21 de austu in iscena b’at a èssere sa cumpangia Batisfera cun duos produsimentos: s’ispetàculu de buratinos “Pingiadas, tiàulos e àteras trampas” de Daniele Pettinau, a sas sete de sero, e s’ispetàculu “Comente isto” de Valentina Fadda e Angelo Trofa. Su fèstival agabbat domìnigu 22 de austu cun sos ispetàculos “Efis e sa Pesta”, un’àteru ispetàculu de buratinos prodùsidu dae Batisfera cun Daniele Pettinau, e “Noighentos” de Baricco, prodùsidu dae Artisti Fuori Posto, cun Piero Murenu e Juri Orrù. S’atore e buratineri Daniele Pettinau, a prus de pigare parte a sos ispetàculos, at a ghiare una cambarada de dischentes pro iscobèrrere e connòschere mègius su mundu ammajadore de sos buratinos e de comente totu si faghent. Dischentes chi domìnigu ant a contivigiare s’ispetàculu “Mustros in mustra”. Totu sos ispetàculos e sos laboratòrios s’ant a cuncordare respetende sas normas istatales, regionales e comunales pro prevènnere s’isparghidura de su Coronavirus. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22