A ischire comunicare unu territòriu non bastat prus. Su mercadu de su turismu est chirchende semper prus esperièntzias chi faghent intrare chie ddu vìsitat in s’ispìritu de su logu, e donare emotziones chi non si podent ismentigare. Gasi s’ìdea di bìvere una die de pastore, chi in Sardigna podet pàrrere una banalidade, pro personas meda in su mundu est una manera ùnica pro fàghere una vacàntzia de non ismentigare. Est una oportunidade manna pro chie dda podet propònnere a sa mègius manera.
Ma est solu unu de sos esempros de isperimentatzione turìstica presentados in su webinar promòvidu dae su GAL Logudoro-Goceano, su 19 de martzu, in dereta streaming in sa pàgina facebook comente tapa noa de su percursu de sos Club di Prodotto.

Est unu atòbiu chi at introduidu temas chi sunt rivolutzionende sa manera de contare su turismu de su benidore: su cuntzetu de esperièntzia. A contare sos detàllios est istètiu Josep Ejarque de sa FTourisma, chi paris a sa Smeralda Consulting est faghende atividade de consulèntzia pro su Gruppo d’Azione Locale pro fàghere su Club di Prodotto. Unu percursu chi, at ammentadu su diretore de su GAL, Giuseppe Sotgiu, est su chi diat a dèpere fàghere su Piano di Azione del GAL “pro torrarea fraigare unu territòriu comente destinatzione turistica de importu”. Segundu Ejarque, in sos annos post-Covid sos turistas ant a tènnere tres bisòngios fundamentales: seguresa e igiene; gana de fàghere esperièntzias, pro ite a bìere non bastat prus, si cheret bìvere su territòriu; e infines su chi si narat wellbeing, est a nàrrere vacàntzias pro istare bene in sa conoca e in su fìsicu.

T.C.

Attività realizzata col contributo della Regione Sardegna – IMPRENTAS 2020-2021. LR 22/2018, art22