A s’incràs de su fogu dannàrgiu chi est passadu peri sas cussòrgias de su Monteferru, su mundu de s’arte amegat de si mòvere pro espressare su bonucoro a sa populatzione de custos logos degolliados, cuncordende una regorta de òperas chi ant interessadu a otanta artistas, fintzas istràngios, chi ant donadu un’òpera issoro.

Totu sas otanta òperas ant a abarrare in mustra dae su 25 de cabudanni a su 10 de santugaine de su 2021 e sos bisitadores las ant pòdere comporare a prètziu prus baratu meda de su valore chi tenent. Su dinari regortu gasi s’at a dare a su Comune de Iscanu, bidda chi at tentu dannos mannos pro more de su fogu, cun sa tarea de torrare a abbiatzare carchi tretu de s’ambiente passadu in fogu.

Sa mustra l’ant a inaugurare sàbadu 25 de cabudanni, a ora de sas chimbe e mesu de sero, in sa sala de sas mustras temporàneas de su Museu de Gennamaria, in Biddanoa de Forru, e at a fàghere a la bisitare fintzas a domìnigu 10 de santugaine, in sos oràrios de abertura de su Museu archeològicu.

Sa mustra l’ant a presentare Paolo Sirena, cun sos artistas chi ant leadu parte a sa faina de bonucoro e cun sas autoridade tziviles de Biddanoa de Forru e de Iscanu. S’inauguratzione, in prus, acontesset in sas Dies europeas de su Patrimòniu (25 e 26 de cabudanni), chi ocannu tenet a tema sa partetzipatzione de totus a sos benes culturales, cun addòbios pro mannos e pro minores.

Cunforma a su chi apostìvigat su D.L. 23 de trìulas de su 2021, n. 105, ant a pòdere intrare solu cussos chi tenent su Lassapassare birde COVID-19, chi bolet mustradu paris cun unu documentu de identidade. Custos disponimentos non balent pro sos pipios chi tenent prus pagu de 12 annos e pro sas àteras persones esentes. Pro intrare a sa mustra, in fines, est de òbligu a si pònnere sa mascheredda e, in s’intrada, a si fàghere mesurare sa temperadura, chi no at a pòdere propassare sos 37,5 grados.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22