Mèrcuris 7 de abrile torrant a mòvere sos apuntamentos in su Web. Cumentzende dae sas 10.00 s’at a pòdere sighire su webinar “Promòvere a manera atziva su voluntariadu” cuncordadu dae s’assòtziu TDM 2000 a intro de sa filera de fainas “Y.E.N. – YOUTH EMPOWERMENT NETWORKING”.

Movende dae un’analizu de su chi s’agatat, su webinar cheret dare consìgios in contu de sas trassas e de sas ainas pro su promovimentu a manera atziva de su voluntariadu e de sas fainas chi faghet.

In Sardigna, difatis, est ativu unu mundu de assòtzios de su de tres setores ricu meda, chi oferit un’agiudu sena de contu a su territòriu. In su matessi tempus, pro chie ddu pràticat, su voluntariadu est un’aina pro sa crèschida e sa formatzione personale. Ma non semper, cando si faeddat de voluntariadu, si resesset a contare a manera atziva custu setore de importu.

E custu, intra de sas àteras cosas, ingendrat un’ismèngua de su nùmeru de sos voluntàrios chi durat dae annos meda e una crèschida a bellu a bellu de s’edade mesana issoro.

Sos relatadores de su webinar ant a èssere Luca Frongia, Presidente TDM 2000 e portaboghe de su Comitadu de sos Assòtzios Sardos pro sa Mobilidade Internatzionale; Carlo Pahler, Diretore de Unica Radio; Gabriele Frongia, Diretore de Sardegnagol. Sos traballos los at a ghiare Michele Demontis, addetu stampa de sa TDM 2000 e de su Comitadu de sos Assòtzios Sardos pro sa Mobilidade Internatzionale.

Pro pigare parte a su webinar, chi at a èssere gratis, tocat a s’allistare in custu indiritzu https://forms.gle/HoDeySqMqfFkhwa98.

S’addòbiu si cuncordat cun s’agiudu de sa Diretzione generale de sas Polìticas sotziales de s’Assessoradu de s’Igiene e de sa Sanidade de sa Regione Sardigna e cun su Patrotzìniu de sa Provìntzia de su Sud Sardigna.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22