Cun sa zona bianca amegant de arribare sos primos turistas e villegiantes.

Custas sunt sas règulas prus de importu chi cherent respetadas pro bènnere a Sardigna.

Cun s’ordinàntzia de su Presidente de sa Regione n. 5 de su 5 de martzu de su 2021 si sunt apostivigadas sas règulas pro arribare a s’ìsula nostra. Custos disponimentos los ant perlongados cun s’Ordinàntzia n. 18 de su 28 de maju de su 2021.

Fintzas a su 15 de làmpadas de su 2021, totu cussos chi cherent sètzere a nave o a aparèchiu pro bènnere a Sardigna, si depent registrare in antis de s’imbarcu cun unu mòdulu in lìnia e depent presentare còpia de sa retzida de custa registratzione paris cun su billete de imbarcu e cun unu documentu de identidade bàlidu. Sa registratzione faghet a la fàghere fintzas cun sa App chi si podet agatare in sas butegas virtuales pro sos sistemas iOS e Android.

Gràtzias a sa prataforma totu is passigeris chi non tenent galu sa tzertificatzione birde prevìdida dae is artìculos 2 e 9 de su D.L. 52/2021 e dae s’artìculu 14 de su D.L. 65/2021 podent decrarare:

– chi si sunt vatzinados, comente previdet s’artìculu 9, comma 3 de su D.L. 52/2021, e custu balet 9 meses dae cando ant fatu sa de duas doses;

– chi sunt passadas 15 dies dae cando ant fatu sa prima dose de su vatzinu, comente previdet s’artìculu 14, comma 2, de su D.L. 65/2021, e custu balet fintzas a fàghere s’àtera dose;

– chi sunt sanados dae s’infetzione SARS-COV-2, e duncas non sunt prus in isulamentu de seguresa, comente previdet s’artìculu 9, comma 2, de su D.L. 52/2021;

– chi ant fatu sas averiguaduras diagnòsticas cun su tampone molecolare in su nasu e in su gùturu pro sa Covid-19 e/o s’esàmene antigènicu, cun resurtadu negativu; su tampone o s’esàmene antigènicu non depet èssere prus betzu de 48 oras in antis de sa partèntzia; sos pipios chi tenent prus pagu de duos annos non sunt sugetos a custu òbligu de lege.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22