Fàghere a lestru sa vatzinatzione in sas biddas de Simaghis, Ollasta e Sabarussa, fàghere cunventziones aposta pro assegurare su servìtziu de meighina de base in sas biddas in ue sos dotores sunt andados in pensione, afortigare s’orgànicu de su Prontu Sucursu de s’ispidale “Santu Martinu” a manera chi funtzionet bene, assegurare sa vatzinatzione de sos “malàidos dìligos” in domo issoro e abèrrere sos tzentros de vatzinatzione in sos comunes.

Custas sunt sas domandas chi su Comitadu de su Distretu sanitàriu de Aristanis faghet a su presidente de sa Regione Christian Solinas, a s’assessore regionale de sa Sanidade Mario Nieddu, a su cummissàriu istraordinàriu de s’ATS Massimo Temussi e a cussu de s’ASSL de Aristanis Antonio Cossu.

In un’addòbiu fatu in Crabas, su Comitadu de Distretu, ghiadu dae su sìndigu de Aristanis Andrea Lutzu, at averiguadu torra sa situatzione sanitària in su territòriu e, cunforma a comente totu s’est isvilupende s’emergèntzia de su Coronavirus, at bogadu propostas noas a sos responsàbiles regionales e locales de sas istitutziones sanitàrias.

Su Comitadu de Distretu domandat fintzas de “assegurare sa vatzinatzione de sos malàidos dìligos in domo issoro cun s’impreu de sos mèigos de meighina generale. Assegurare sa possibilidade, pro totu sos comunes chi lu domandant, de abèrrere tzentros de vatzinatzione locale. In fines, de informare bene sa populatzione in contu de sa manera de vatzinare a sos malàidos dìligos, de sas prioridades, aberende servìtzios de informu a livellu locale”.

aig.

Attività realizzata col contributo della Regione Sardegna – IMPRENTAS 2020-2021. LR 22/2018, art22