Su contu de s’amori tra Vittorio Pitzalis e sa mùsica est unu contu longu, chi cumentzat a piciocheddu piticu candu su fradi dd’iat arregalau una ghitarra. Oi su bluesman de Pirri, o Pirrissippi cumenti narat issu, tenit 60 annus e no at acabau ancora de sonai sa ghitarra cantendi su blues. In mesu, una vida in pitzus de su palcu, cun milli progetus e milli cuntzertus a giru in s’ìsula e aforas. No at sonau sceti blues ma mùsica de dònnia genia, rock, country, brit pop, etc. ma a s’acabada est torrau a su blues, sa mùsica de su coru. A bellu a bellu funt cumentzaus is primus palcus importantis, is festival de blues impari a legendas cumenti a Robert Plant e Bo Diddley.

Ma si scit ca is cosas no est sèmpiri chi girint beni e perou candu sa noti est prus scura si bit giai s’obrescidroxu, e aici un’ex scienti de issu Michelegiuseppe Rovelli ddi proponit de fai su primu discu Jimi James in su 2017. Infatu torrant a partiri is festival, e Pitzalis a fortza de ndi binci innoi e innias, nci dd’acabat a sonai a su International Blues Challenge de Memphis, Tennessee, e agoa su Mississippi, sa Sun Records e Graceland, logus mìticus chi dd’ant ispirau po s’ùrtimu discu The time has come.

No sceti a Rovelli depit torrai gràtzias ma finas a Marti Jane Robertson po su mastering, Checcho Adamo po sa gràfica, Francisca Ardau e Andria Giacomini po is fotografias, is sonadoris chi ant sonau cun issu cun su cuartetu de arcus Massimilianu Pani, Martinu Piroddi, Maurìtziu Biancu e Alèssiu Pòvolo e a Matteo Floris po sa tuba. Bogada calincuna cover de is mitus suus, su discu est totu scritu de issu, cantau acumpangendisì a ghitarra, cun cudda boxi sua chi parit serregada ma chi est bìvia e sunfria, ca su blues est contu de vida e bolit cantau cun su coru, ca cun su blues a imbrolliai no fait.

T.C.

Attività realizzata col contributo della Regione Sardegna – IMPRENTAS 2020-2021. LR 22/2018, art2