In Serdiana sa prima editzione de Serdian’art, fèstival de s’arte e de s’artesania

Sàbadu 18 e domìnigu 19 de nadale s’allumant sas lughes de Serdian’art, sa prima editzione de su fèstival de s’arte e de s’artesania de Serdiana. Una manifestatzione chi si movet intra de su connotu e s’annoadura, pro avalorare sas cosas bellas e is iscusòrgios de s’artesania artìstica e de s’arte de cussa cussòrgia. Ant a èssere duas dies dedicadas a mannos e minores pro torrare a iscobèrrere e bìvere paris emotziones, sabidorias e sabores de su tempus passadu.   Cuncordada dae s’Amministratzione comunale de Serdiana cun s’agiudu de Video Vision e de su tzìrculu de leghidores ‘Miele Amaro’, Serdian’art naschet dae s’addòbiu cun una cambarada de artistas de sa bidda e tenet sa tarea de si fàghere unu riferimentu pro su mundu de s’arte e de s’artesania. Su programma ricu de su fèstival cumentzat a sas tres de sàbadu 18 de nadale cun s’inauguratzione de sa mustra cuncordada in sas salas de su Tzentru de acumonamentu sotziale chi at a acasagiare sas creatziones e sas presentadas a bolu de batòrdighi maistros nòdidos de s’artesania e de s’arte, paris cun sos traballos fatos dae sos artistas giòvanos de su tzentru sotziale.   Intra de sos artesanos s’ischerant sos nùmenes de Luigi Pitzalis, miradore de sa cultura de sos ramenajos, Alessandra Floris de Su strexu de fenu e Paolo Pittiu, ebanista, maistru de oro, progetadore chi in su tempus at torradu a pensare s’arte sarda de sas prendas isparghende-la in totu su mundu.   Intra de sos artistas Serdian’art acasàgiat a DNA (Fernando Altea), iscultore impinnadu in su sotziale e atentu meda a su raportu intra de s’òmine e s’ambiente; Pino Asunis, iscultore de linna de ghinìperu e de olia; Heim (Andrea Altea), artista cuntzetuale chi s’ischerat pro s’annoadura in sa chirca de materiales e solutziones artìsticas; s’artista de su filu Elisa Congiu (chi cun is fainas suas de tessìngiu est capatza de creare òperas ammajadoras); Salvatore Dessì, creadore de personàgios de sa cummèdia de s’arte fatos de cartapista.   A.I.G. Attività realizzata col contributo della Regione Sardegna – IMPRENTAS 2020-2021. LR 22/2018, art22